قصيدة ما تنسي خيبر للغالي ملا باسم الكربلائي

ما تنسي خيبر
لا والله يا حيدر
يل طبعك اطباع الذهب
يلمعدنك جوهر
كلما يمر بيك الزمن تغلى بعد اكثر
*********
طبع الذهب يا بالحسن من تصهرة النار
يكثر صفاءة ويرتفع وتزيد الاسعار
وانتة دخلت نار الحرب يا حامي الجار
كلما يزيدون اللهب تصمد يكرار
يا اصفى كل معدن
يلقيمتك اثمن
كلشي سعر بيه وثمن وانتة المتتسعر
كلما يمر بيك الزمن تغلى بعد اكثر
************
كالو علي الدر والذهب والوادم تراب
بهاي الذهب هو انمدح يا داحي الباب
كلة درة تخضع للسعر تخضع للحساب
وانتة الي ميحدك ثمن يا درالالباب
سعر العرش سعرك
وبهل قدر قدرك
كلما نطالع سيرتك يتوضح المصدر
كلما يمر بيك الزمن تغلى بعد اكثر
************
اتبعنة موارد سيرتك واليتبعك فاز
كلشي بحياتك معجزة ومصدر للاعجاز
من مولدك حد مقتلك مجموعة الغاز
بالكعبة نورك ينولد هذا اول انجاز
من هذا برهانك
ربك رفع شانك
كلما كبر عمر الدهر مجدك بعد يكبر
كلما يمر بيك الزمن تغلى بعد اكثر
************
حجر النبي الهادي انشأت وبلطفة رباك
مفتاح ابواب العلم يلمرتضى انطاك
كل باب الف باب انفتح وبعلمة اثراك
هو المدينة للعلم باب الهة خلاك
باب العلم انتة
سور العدل صنتة
الوجهك سجد وجه الدهر وبعالمك فكر
كلما يمر بيك الزمن تغلى بعد اكثر
************
كل غزوة جنت وية النبي تصنع بطولات
واندحرت بسيفك هبل والعزة والات
بالخندق وخيبر الك ظهرت كرامات
ادحرت اليهود بهمتك يا اوحد الذات
مرحب الك يشهد
يا معجزة احمد
رغم اليهود اترفعت شانك فلا يزغر
كلما يمر بيك الزمن تغلى بعد اكثر
*************